Haltu mér slepptu mér

Mér finnst þetta hljóma hálf dapurlega.  Samfylkingin virðist ekki vera tilbúin að afla sér endurnýjaðs umboðs frá kjósendum, heldur þvinga fram breytta stjórnarstefnu frá sundurtættum samstarfsflokki.

Auðvitað þarf ríkisstjórnin nýja stefnu, hún þarf reyndar fyrst og fremst einhverja stefnu, en hver verður trúverðugleikinn með sama fólkið innanborðs?.

Trúverðugleiki núverandi stjórnvalda er ekki beysinn og ég efast um að nýr stjórnarsáttmáli breyti þar einhverju......en hvað veit ég.

U2 með With or without you....

 

Vilja nýjan stjórnarsáttmála

Silfur Egils

Mikið fannst mér gott að horfa á  Silfur Egils í dag.  Vandamálin viðurkennd af öllum, sem þar komu fram og tillögur að úrlausnum settar fram á mannamáli. 

Ég vona svo innilega að ráðamenn þjóðarinnar hafi verið með eyrun opin, og ef þeim líkar ekki við framsettar tillögur, vona ég að þeir svari þjóðinni á málefnalegan hátt, með rökstuðningi en ekki útúrsnúningi.

Takk fyrir góðan þátt Egill Helgason.

 

Virkir þjóðfélagsþegnar eða smáborgarar, hvort erum við?

Ég fór á mótmælafundi í dag, fyrst á borgarafund í Iðnó, sem að mínu mati var mjög vel heppnaður.  Ræðumaður dagsins þar, að öllum frummælendum ólöstuðum var Halla Gunnarsdóttir, blaðamaður, hún var hreint út sagt alveg frábær.  Stjórnmálamennirnir, sem þar tjáðu sig eru ennþá í einhverri flokkapólitík og eru ekki ennþá búnir að átta sig á að þeir "fiska" ekki í því ölduróti, sem kjósendur svamla í.

Fyrir utan Iðnó hitti ég besta bloggara landsins Láru Hönnu Einarsdóttir,larahanna og u.þ.b. sem Iðnófundi var að ljúka skunduðum við yfir á Austurvöll með kröfuspjöldin okkar "Spillinguna burt", tókum okkur stöðu og fylgdust með á meðan fleiri þúsund góðborgarar komu sér fyrir á svæðinu.

Þetta voru venjulegir, en kjarkaðir Íslendingar, sem vilja sýna óánægju sína og reiði í verki með því að mæta.  Ég segi "kjarkaðir", því við Íslendingar erum ótrúlega miklir "smáborgarar", þegar kemur að því að segja skoðun okkar á málefnum líðandi stundar.  

Fjölmiðlarnir okkar eru undirlagðir af svona smáborgurum og tala á frekar niðrandi nótum um okkur mótmælendur.

Umfjöllun Stöðvar 2, var fyrir neðan allar hellur og Mbl.is leggur áherslu á að eggjum hafi verið kastað í Alþingishúsið, það er fyrirsögnin í fréttinni um þennan velhepnaða, fjölmenna mótmælafund.  Eggjakastið sem framkvæmt var af hluta fundarmanna, hófst ekki fyrr en að formlegum mótmælafundi var lokið.  Ekki ætla ég að lasta þessa aðferð mótmæla, ég skil reiði þessara einstaklinga afar vel.... en ég hefði samt frekar notað mykju en ekki mat

Jú, jú Bónusfánanum var flaggað, það fannst mér flottur gjörningur.  Simbólískt flott.  Hvað ætli það séu margir þingflokkar þarna innandyra, sem eiga í þakkarskuld við þá Baugsmenn fyrir ríflegar greiðslur í kosningasjóði þeirra?  Það fáum við væntanlega að vita, þegar það hentar stjórnmálamönnunum að opna bókhald flokkanna upp á gátt.....en það verður sjálfsagt aldrei. 

Á meðan fjölmiðlar halda áfram að draga það fram, sem þeim finnst "verst" við mótmælin, mun smáborgarabragurinn blómstra, því "smáborgarar" vilja halda í þá ímynd að þeir séu "góðborgarar" og mæta seint á mótmæli, sem lýst er að hætti húsbóndahollra blaðamanna og það er sennilega tilgangur þeirra......en af hverju, skil ég ekki.

Mótmælafundirnir í dag voru þrusugóðir og það fyllti mig stolti að tilheyra þessum ört vaxandi hópi í samfélaginu, sem mótmælir spillingu og úrræðaleysi íslenskra ráðamanna og útrásarvíkinga, við erum virkir þjóðfélagsþegnar

Meðfylgjandi myndir voru fengnar "að láni" hjá Eyjan.is, sem var með ágætis umfjöllun um mótmæin í dag.

Eggjum kastað í Alþingishúsið

Knús á Pólverja...Burt með spillingarliðið!

Ég er að fara á haustfagnað Skjóls og Eirar, ég skal kyssa pólverjana frá okkur, ég er nokkuð viss um að þeir verða nokkrir þarna.  Kannski verður þetta síðasta kvöldmáltíðin, sem Sr. Sigurður býður upp á í bili.......það verða jú allir að spara

Eina ferðina enn erum við að lesa fréttir af gangi mála í erlendum fjölmiðlum.  Þetta er náttúrulega ekki í lagi.

Ég ætla að vera eldhress á morgun og mæta á öll þau mótmæli sem í boði verða, hvort sem það er borgarafundur í Iðnó kl. 13:00, eða mótmælafundur á Austurvelli kl. 15:00.  Vonandi sé ég ykkur sem flest

Burt með spillingarliðið, sama hvar í flokki það stendur!

 

Geir staðfestir pólska aðstoð

Vér jarðbundnir! Burt með spillingarliðið!

Mér finnst þetta merkileg frétt á vef Mbl.is.  Breskur veðmangari vill höfða til "áhættufíkla" um afstöðu þeirra til þess hvort Guð sé til.  Kannski er hér komin gróðaleið fyrir Íslenska áhættufíkla.

Ég fékk ósköp venjulegt "kristilegt" uppeldi eins og það gerðist víðast hvar á Íslandi eftir miðja síðustu öld.  Ég var líka að eigin mati mjög heppin með sóknarprest, sem að mati okkar litla samfélags var eldrauður kommanisti.

Hann hélt því blá kalt fram að Guð væri til....en að hann væri ekki hvíthærður kall, sem lifði skýjum ofar, heldur væri hann  hluti af okkur sjálfum, í samvisku okkar og gjörðum.  Ég trúði honum og geri enn.

Sr. Jóhannes Pálmason, var frábær, jarðbundinn og gamansamur maður.  Hann tók virkan þátt í öllu samfélagsstarfi og Súgfirðingar munu ávalt þakka fyrir hans innlegg í þorpsmyndina.

Hann súmmeraði þorpslífið og heimsmyndina upp í gamanvísum, sem sungnar voru á menningarhátíðum þorpsbúa, hvort sem það voru Þorra- eða Góufagnaðir, barnaskemmtanir eða bara stórafmæli einstakra þorpsbúa.

Í Sunnudagaskólanum var alltaf þéttsetin kirkjan okkar, því hann hafði það fyrir sið að lesa fyrir okkur spennandi framhaldsögur, sem hann þýddi úr erlendum tungumálum á staðnum, svo við gátum ekki leitað uppi bókina á milli sunnudaga.  Við fengum reyndar Jesú myndir eins og "lög" gerðu ráð fyrir.....en það var bara bónus.

Messurnar á aðfangadagskvöld eru líka minnisstæðar, því maður fór heim með hugann við hungraðan heim.....og ég hugsa ennþá til barnanna í Konsó, þegar ég sest að veisluborðinu þetta kvöld.

Þegar Sr. Jóhannes flutti frá Súgandafirði til Borgarfjarðar og varð sóknarprestur í Reykholti, varð mikill söknuður hjá þorpsbúum og leit hófst að nýjum presti.  

Nokkrir sóttu um brauðið, en var hafnað.....enginn umsækjanda þótti fylla skarð Sr. Jóhannesar.  Þá rak á fjörur þorpsbúa prestlærð kona og var hún ráðin án mikilla málalenginga.

Sr. Auður Eir Vilhjálmsdóttir, fyrsta konan sem fékk prestvígslu á Íslandi, var boðin velkomin til Súgandafjarðar.  Þar fékk fyrsta konan sitt fyrsta "brauð".  Þarna tel ég að Súgfirðingar hafi sýnt í raun hvað þeir höfðu meðtekið af boðskap "kommúnistans" og prestsins Sr. Jóhannesar Pálmasonar:  Fyrir Guði eru allir jafnir og kyn skiptir þar engu máli.  Samviska okkar og siðferði er okkar Guðdómur.

 

 

 

 

Ég myndi aldrei taka þátt í veðmáli þessarar bresku veðmálastofu......þótt ég telji mig vita fullvel að Guð er til.......hann er samviska okkar og siðferði.  Eða eins og Sigga amma mín orðaði svo vel:  Guð er kærleikurinn, sem er sterkasta aflið í heiminum.

 

 

 

Auknar líkur á tilvist Guðs

Ég er svartsýn

því get ég ekki neitað.  Mér finnst ástandið hörmulegt í þjóðfélaginu og ég finn til með öllu því fólk sem nú þegar hefur misst atvinnuna og á eftir að missa vinnuna.

Sjálfsagt getum við flest verið sammála um að þenslan í byggingaframkvæmdum hér á höfuðborgarsvæðinu hafi verið úr hófi fram.  Hér var ætt áfram í gengdarlausum fjárfestingum án þess að innistæða eða raunveruleg þörf væri fyrir þeim.  Þetta var allt afleiðing af gervi fjármagninu sem bankarnir buðu upp á...sennilega með veði í hlutabréfum, sem bankastjórnendur létu prenta með reglulegu millibili.

Mér finnst langlundargeð landans alveg með ólíkindum.  Hér ríkir stjórnleysi og upplausn.  Upp koma spillingarmál nær daglega....en við bara bíðum eftir að eitthvað verði gert.  

Þetta gengur ekki lengur.  Nú verða allir sem geta því við komið að mæta á Austurvöll næsta laugardag kl. 15:00 og sýna samstöðu í mótmælum.

 

Burt með spillingarliðið, sama hvar í flokki þeir standa! 

 Rolling Stones túlka hugsanir mínar þessa dagana:  Paint it black

Um 70% samdráttur

Margur heldur mig sig..

Ég verð nú að segja að þingmaðurinn, sem líkti sjálfri sér og sínum kollegum við afgreiðslufólk á kassa gerir lítið úr starfi þeirra síðarnefndu.

Starfsfólk á kassa sinnir mjög ábyrgðarmiklu starfi.  Um það gilda reglur og væntingar.  Ef starfsmaður á kassa stendur sig ekki í starfi, er hann látinn "taka pokann sinn" án málalenginga.

Ef þetta starfsfólk mætir ekki í vinnuna sína á tilskyldum tíma, fær það áminningu.  Þetta starfsfólk þarf sjálft að berjast fyrir bættum kjörum, en hefur lítið orðið ágengt vegna m.a. vegna virðingarleysis þingmanna í sinn garð.  Þingmenn ættu nefnilega fyrir lifandis löngu síðan að vera búnir að "afgreiða" lög um opinberan framfærslugrunn, svo starfsfólk á kassa viti fyrir hvaða launum þeir ættu að berjast fyrir.

Starfsfólk á kassa, þarf að vera athugult, (sbr. Davíðsseðlar!), sýna almenningi kurteisi og umfram allt annað þarf það að bera ábyrgð á störfum sínum (uppgjöri) í lok vinnudags

Burt með spillingarliðið, hvar í flokki sem það stendur

Þingmenn eins og afgreiðslufólk á kassa

"Meðferðarúrræði" skoðuð...

Bankamenn fá enga sérmeðferð, almenningur fær enga sérmeðferð en spurning mín er:  Er bankamálaráðherrann að fá sérmeðferð hjá þjóðinni?

Bankamálaráðherrann Björgvin, "segist ekki hafa kynnt sér stofnun einkahlutafélaga utan um hlutabréfakaup í bankanum en þetta verði allt saman skoðað. Það sé örugglega margt löglegt en siðlaust sem hafi átt sér stað í fjármálalífinu. Það verði að fara í þá vinnu nú að byggja upp heilbrigðara og traustara fjármálakerfi".

Fjármálaeftirlitið, sem heyrði engar viðvörunarbjöllur hringja vegna yfirvofandi hættu á fjármálamarkaði fær áfram umboð stjórnvalda til að rannsaka "löglegu siðleysuna" fyrir hrun bankanna.  Brosandi/glottandi bankamálaráðherrann, sem sagður er hafa sagt eitt og annað við f.v. vini sína í Breska Verkamannaflokknum, sem rýrt hefur trúverðugleika Íslendinga á alþjóðavísu, er ennþá með umboð flokksfélaga sinna til að vera yfirmaður sökkvandi siðspillts bankakerfis.  Til hans skulu rannsóknar aðilar snúa sér, með "hvítþvott" og tillögur að úrbótum fyrir hið Nýja "trúverðuga" bankakerfi, sem brást undir hans stjórn.

Væntanleg "Hvítbók" verður samin af þeim, sem brugðust eftirlitsskyldu sinni og eiga stærstan þátt í falli íslenska hagkerfisins:

Bankamenn fá ekki sérmeðferð

I told you so..........

Þeir eru orðnir ansi margir sérfræðingarnir, sem geysast nú fram á ritvöllinn og segjast hafa varað Íslendinga við en að á þá hafi ekki verið hlustað.  Svör íslenskra ráðamanna við þessum viðvörunum voru á einn veg: "Öfundar og úrtölufólk" sem ekki er mark á takandi!

"Ábyrgðin vegna íslenska efnahagshrunsins liggur fyrst og fremst hjá bönkunum, ríkisstjórn, Seðlabanka, Fjármálaeftirliti og Alþingi. Þetta segir norski hagfræðingurinn Harald Magnus Andreassen, hagfræðingur hjá norska verðbréfafyrirtækinu First Securites, en hann hefur kynnt sér íslensk efnahagsmál.

„Þessar stofnanir samfélagsins eru ábyrgar með einum eða öðrum hætti. En ekki venjulegt fólk, Jón og Gunna,“ segir Andreassen."

Mikið held ég að sonur minn (Jón Eric) og tengdadóttir (Guðrún Freyja) séu glöð að sjá þetta á prenti.

Annars finnst mér örla á smá illgirni og stærrilæti  gagnvart Íslensku bjánunum í lok þessa viðtals:

"Að vissu leyti má segja að það hafi verið gott að þessi spilaborg hrundi núna en ekki eftir tvö til þrjú ár. Þá hefði þetta orðið ykkur enn dýrkeyptara. Það hefði átt að vera búið að stoppa ykkur fyrir löngu, en þið voruð heppin að hrunið varð núna.“ segir hann.

Andreassen kveðst telja að Norðmenn hafa takmarkaðan áhuga á að taka á sig byrðar vegna íslenska efnahagshrunsins. „Ég á ekki von á því að Norðmenn séu reiðubúnir að leggja háar fjárhæðir í að greiða niður skuldir Íslendinga. Þið skuldið miklu meira en þið getið greitt þjáningalaust. Ég býst við að flestir Norðmenn myndu segja – látum þá þjást um tíma. Þetta er ekki okkar vandamál. En við myndum ekki láta ykkur svelta.“

Nei hr. Andreassen, Jón og Gunna voru ekki heppin

• Þakkir til Færeyinga
  
  

 

 

 

 

„Hefði átt að vera búið að stoppa ykkur fyrir löngu"

Á trúnó við PM of UK....

En okkur kemur þetta ekki við þótt liðnir séu nokkrir mánuðir, þ.e. maí, júní, júlí ágúst, september og október = 6 mánuðir/1/2 ár!  Við þurfum bara að ímynda okkur ferlið og stöðuna.

Geir, þér er boðið á trúnó við þjóðina þína

Fjölmiðlar eru búnir að tvöfalda opinberar tölur af mótmæla vettvangi.....þetta er allt að koma.  Kannski er ég draumórakona sem er fyrirfram farin að sjá breiðfylkingu þjóðar......á byrjunarreit.

Imagine all the people með John Lennon:

 

Geir aðvaraði Brown í apríl