Geymsluplássið er dýrt...

...og ég gæti alveg geymt eitt stykki bíl fyrir bílasalana í einhvern tíma því bíllinn hjá mér er í lamasessi og sú upplifun er mín mesta "frelsissvipting" hingað til  Ég veit, ég veit, líf mitt hefur verið dans á rósum og veit ekki hvað raunveruleg fangelsun þýðir

Ég myndi gjarnan vilja fjárfesta í nýlegri bíldruslu, en það er bara ekki í myndinni að svo stöddu.  Ég missti af síðasta mótmælafundi, þar sem strætókerfið var mér framandi, vissi ekki að ferðum fækkaði um helgar

Mér var vinsamlega bent á það í morgun að ég gæti slegið 2 flugur í einu höggi, þ.e. komast á staðinn og mótmæla hljóðlega eins og "lög gera ráð fyrir" með því að mæta svona á næsta mótmælafund:

 

Alkul í bílasölu

Greiðsluaðlögun v/góðærisflipps!

Þetta hlýtur að vera það sem átt er við með "góðærisflipp".  Að kaupa sér bústað á Manhattan og greiða fyrir með 3ja milljarða króna yfirdrætti  frá viðskiptabankanum mínum skv. Orðinu á götunni.  Hvað voru menn eiginlega með rúma yfirdráttarheimild?

Ég veit vel að viðskipta umsvif þeirra hjóna hafa verið stjarnfræðilega mikil og yfirdráttarheimild þeirra þess vegna aðeins hærri en gengur og gerist hjá öðrum Jónum og Ingum.

Ég er ennþá að lesa um og heyra að "þjóðin" hafi verið á  góðærisflippi.  Það getur vel verið að sú sé reyndin með einhverja, sem vegna ágætra tekna hafi freistast til að auka yfirdráttinn.  En ég veit að láglaunastéttir höfðu ekki þennan aðgang að auknum yfirdrætti eða lánum...bankamennirnir voru einfaldlega ekkert að hygla þessu fólki.

Ég bíð enn í ofvæni og með kvíðhnút í maganum eftir væntanlegu frumvarpi um "greiðsluaðlögun" skuldara.  Mér skilst að það eigi að þrengja töluvert upprunaleg frumvarpsdrög og koma bara til móts við þá sem hafa lækkað í tekjum vegna atvinnumissis um meira en 20%.  Þeir sem enn halda atvinnu, þó að um láglaunafólk sé að ræða verða að öllum líkindum skildir útundan.

Hjónakornin Jón Ásgeir og Ingibjörg Pálma, ættu að athuga með greiðsluaðlögun, því þau falla vafalaust undir þessa skilgreiningu ráðamanna.  Þau geta örugglega sýnt fram á meira en 20% samdrátt á tekjum vegna hrunsins.

Vil svo benda á að Huldu ríkisspítalaforstjóra er gert að skera niður um 3 milljarða á fjárlögum þessa árs, sjá hér.  Þetta er sama upphæð og Jón og Inga gátu tekið út með sinni "yfirdráttarheimild" vegna kaupa á "hvíldaraðstöðu" á Manhattan.

Hvað ætli Hulda þurfi að loka mörgum "hvíldarinnlagnar" plássum fyrir fársjúkt eldra fólk í þessum niðurskurði sínum?

Selja íbúð á Manhattan

Velmenntaðir hálf-vitar!

Reynslulausir "vel menntaðir" hálf-vitar komu þjóðinni í áratuga skuldafen.  Ég segi hálf-vitar, þar sem flestir sem komnir eru til "vits" og ára, hafa gert sér grein fyrir því að menntun ein og sér hefur ekkert með vit að gera.  Vitið kemur með reynslunni.

Ég mun alltaf muna eftir orðum unga viðskiptafræðingsins, sem kom til starfa í fjölskyldufyrirtækinu sínu úti á landsbyggðinni: 

"Á þeim 4 árum sem ég hef starfað hér hjá fyrirtækinu, hef ég lært meira um rekstur fyrirtækis en háskólamenntun mín hefði nokkurn tíma getað búið mig undir"!

Menntun er að sjálfsögðu góð undirstaða, en það er reynslan sem gerir fólk að sérfræðingum.

Í dag er að ég held 19. mótmæla/samstöðu fundur Radda fólksins á Austurvelli.  Hann hefst að venju kl. 15:00.

Í dag ætla ég m.a. að mótmæla því að ungir "vel menntaðir" en reynslulitlir hálf-vitar voru settir við stjórnvölinn í viðskiptabönkunum.

Ræðumenn dagsins eru:

• Elísabet Jónsdóttir, ellilífeyrisþegi
• Ágúst Guðmundsson, leikstjóri

Fundarstjóri er: Hörður Torfason.

 

 

Reynslulausir réðu í bönkum

Munu Bretar taka af okkur ómakið?

....og fangelsa ísl. fjárglæframennina?

Munu þeir finna fjársjóðina, sem komið hefur verið undan?

Getur verið að forsemda þess að Bretar geti rannsakað hrun íslensku bankanna sé hin umdeilda hryðjuverkalöggjöf?

Getur verið að Darling/Brown hafi vitað meira um spillingu ísl. fjárglæframanna en þeir hafa gefið upp?

Getum við ekki betur treyst "óvilhöllum" rannsóknaraðilum?

Af hverju var reiði ísl. stjórnvalda bara í nösunum á þeim þegar kom að umfjöllun um hryðjuverkalögin?

Af hverju ræddi ísl. forsætisráðherrann aldrei við Darling/Brown vegna hryðjuverkalöggjafarinnar?

Var það sæmandi ísl. forsætisráðherra að fara bara í fýlu, þegar við blasti gjaldþrot ísl. þjóðarinnar?

Og að allt öðru;  Hvaða einstaklingum ætla núverandi stjórnvöld að bjarga með frumvarpi um greiðsluaðlögun?

Hvað líður því frumvarpi og öllum öðrum aðgerðum til bjargar ísl. heimilum?

Íhuga rannsókn á bankahruni

Þingmenn eiga að skammast sín....

Og hún lét þá heyra það sómakonan Ragnheiður Ólafsdóttir, nýr varaþingmaður Frjálslynda flokksins eins og sjá má hér.  Tók mér það bessaleyfi að linka á myndbandið inni hjá Láru Hönnu.

Er það kannski svona fólk sem við eigum að skima eftir í kosningabaráttunni?  Fólk með bein í nefinu og sem er löngu vaxið upp úr sandkassaleikjum litlu strákanna, sem eru nýskriðnir af skólabekk.

Þetta var hressandi og til eftirbreytni.  Takk fyrir Ragnheiður.

 

 

 

p.s.  Annars voru framboðsfundirnir fyrir vestan algjör snilld og þaðan hefur maður sennilega þennan óbilandi áhuga á pólitík

Látið karpið bíða til kosningabaráttunnar

Hálfnað verk þá hafið er....

....en af hverju 1. júní?  Hvernig hljómaði nú aftur eftirlaunafrumvarpið, sem síðast var lagt fram á alþingi?  Man einhver?

Ingimundur hættur, Eiríkur hættir en Davíð mun væntanlega sitja meðan meðan Bessastaðabóndinn situr.  Er það ekki málið?

Svo er það nefndin sem sett var á fót til að segja okkur það sem við höfum alltaf vitað.  Niðurstaða; Eigendur bankanna og bankastjórar, eru ábyrgir fyrir hruni þeirra og  stjórnvöld sinntu ekki eftirlitshlutverki sínu nægilega vel

 

Eiríkur hættir í júní

Mjólk er góð...líka í Kanada!

Hvort ætli sé nú lífvænlegra, blaðaútgáfa á fallandi fæti eða mjólkandi uppistandandi beljur?  Beljurnar að sjálfsögðu.  Mikið er nú Einar Sigurðsson, forstjóri Árvakurs hf. heppin að það er ennþá eftirspurn eftir forstjórum í okkar nýorðna bláfátæka landi.  Ég óska honum velfarnaðar í starfi og vona að enn um sinn verði einhverjir búsettir hér, sem muni hafa efni á að kaupa sér lífsnauðsynlegar mjólkurafurðir.

Ég er ennþá að velta fyrir mér viðtali við nýjan félagsmálaráðherra, sem var hræð yfir góðmennsku og vinarþeli Kanadamanna í fréttum RÚV í gærkvöldi.  Ætli nýi félagsmálaráðherrann sé fyrirfram búin að gefast upp við þau áform að koma hér atvinnulífinu í gang, svo við missum ekki "fagfólkið" okkar úr landi.  Hún ætlar alla vega að taka vel á móti Kanadamönnum og auðvelda þeim leitina að íslenskum flóttamönnum.

Kanadamenn vilja íslenskt fagfólk í vinnu og eru tilbúnir að greiða þeim götuna, sem þangað vilja koma.  Þeir leita að vinnufúsum höndum, ekki forstjórum eða þesskonar afætum.  

Ég er sjúkraliði, eldri sonur minn er málari og sá yngri er að læra rafvirkjun.  Kanadamenn leita að fólki eins og okkur....við munum íhuga tilboð þeirra vandlega, ásamt fjölda annarra Íslendinga, sem eru ekki tilbúnir að láta loka sig af í skuldafeni af völdum fjárglæframanna. 

Við erum öll komin með upp í kok af málæði misvitra stjórnmálamanna, sem gera ekkert annað en að máta sig við vilja kjósenda í komandi kosningum.

Nýr félagsmálaráðherra hefur á sínum laaanga stjórnmálaferli talað nógu fjálglega um hvað þurfi að gera til að koma til móts við þá sem minna mega sín í þjóðfélaginu.  Sér hún lausn í því að vinnufúsar hendur flytji til annarra landa og að sameiginlegur velferðarsjóður rýrni í hlutfalli við það.

Hvernig ætli mjólkurafurðir bragðist í Kanada?

Einar Sigurðsson frá Árvakri til MS

???

Getur það verið að allir póstar stjórnkerfisins hafi verið skipaðir "óvitum"? 

Væri kannski ráð að fá leikskólakennara til að tala þá til sem ennþá sitja?

Af hverju ætli hugtakið "landráð af gáleysi" komi upp í hugann?

Ætli við komum til með að sitja uppi með alla pólitísku óvitana eftir næstu kosningar? 

Ætli við Íslendingar getum sótt um sem pólitískir flóttamenn í einhverju góðu og siðmenntuðu landi?

Veðjuðu á endurlífgun hagkerfisins

8. febrúar - afmæliskveðja!

Ég fékk skemmtilegt símtal einn daginn í vikunni, það var eitthvað á þessa leið;

Amman:  Halló

Róbert Skúli:  viltu koma í afmælið mitt á sunnudaginn klukkan 3?  Ég á sko afmæli, þú veist

Amman:  Já, já, elsku drengurinn minn, það vil ég gjarnan.  En ég kem kannski svolítið of seint af því ég er að vinna á sunnudaginn....en ég kem bara þegar ég er búin að vinna, er það ekki í lagi?

Róbert Skúli: Jú, en amma, þú þarft að koma með afmælispakka, það þarf að gera það sko

Amman: Að sjálfsögðu kem ég með pakka.  Hvað langar þig í í afmælisgjöf?

Róbert Skúli: Ha..

Amman:  Hvað á ég að hafa í afmælispakkanum?

Róbert Skúli:  Ég veit það ekki.....bara eitthvað sem mig langar í 

Til afmælisveislu þér amma er boðið,

með afmælispakka með þér.

Hann hefur  ei orðalagið loðið,

hann er samkvæmur sjálfum sér.

 

 

Amman í afmæli haskar sér,

afmælispakkinn er klár,

Róbert  Skúli mun ráða för hér,

rogginn og ei lengur smár.

 

Fjörugur, frábær drengur er,

fjögurra ára í dag.

Í samkvæmið safnar hann heilum her,

sem syngja hans afmælislag.

 

 

 

 

 

Þótt Róbert Skúli sé veiðikló mikil, er ég ekki viss um að hann bjóði upp á fisk í boðinu sínu.  Amman þurfti bara að nota þessar "eldgömlu" myndir þar sem foreldrasettið er orðið svo lélegt við að uppfæra heimasíðuna hans (þaðan sem hún hefur nælt sér í ófáar perlurnar)

Auðvitað mun Róbert Skúli bjóða upp á kökuhlaðborð, því hann er flottastur!

 

 

Elsku ljúfi strákurinn minn, til hamingju með 4ra ára afmælið þitt

Ég mæti í veisluna minn kæri......með pakka

Amma elskar þig

Baráttan er ekki búin.

Ég er nokkuð viss um að Ingimundur Friðriksson er vammlaus og heilsteyptur maður.  Ég minnist þess að í lok október skrifaði ég pistil, þar sem ég lýsti því yfir að mig langaði til að hitta manninn og fá mér mjólkurglas með honum yfir léttu spjalli.  Held að hann hafi reynt að vera með smá andóf gegn Konungnum í Svörtuloftum en hafi nú endanlega gefist upp.

Hvað Eiríkur Guðnason er að hugsa er erfitt að segja til um og Davíð Oddson er náttúrulega óútreiknanlegur og koma þá kennsluaðferðir gamla stærðfræðikennarans míns á Núpi að jafnlitlum notum og þær gerðu þá;  "Þorsteinn, ég skil ekki" - "það er ekkert að skilja bara kunna Sigrún mín" taka 2; "Þorsteinn ég kann ekki" - "það er ekkert að kunna Sigrún mín, bara skilja"

En andófi "þjóðarinnar" er langt í frá lokið.  Við þurfum að halda vöku okkar nú sem aldrei fyrr.  Stjórnmálamenn mega ekki halda að með þeim breytingum sem við náðum fram með búsáhaldabyltingunni séum við orðin södd og sæl.  Það er langt í frá.  Við viljum breytt þjóðfélag, önnur gildi en verið hafa í fyrirrúmi og réttlátara samfélag.

18. mótmæla- og samstöðufundurinn verður haldinn á Austurvelli kl. 15:00 í dag.  Ég vona að mæting verði góð, því oft var þörf en nú er nauðsyn.  Ég er því miður að fara á kvöldvakt og vona ég því að einhver sem þetta les og hafði ekki hugsað sér að fara, drífi sig að stað og standi þá líka pliktina fyrir mig

Ræðumenn dagsins eru hlustunar virði:

• Laufey Ólafsdóttir, formaður einstæðra foreldra
• Andrés Magnússon, geðlæknir

Fundarstjóri er: Hörður Torfason.

Að lokum vil ég benda á frábæran pistil eftir Valgeir Skagfjörð, sem hægt er að lesa á blogginu hennar Láru Hönnu.  Þessi pistill ætti að hreyfa við þeim sem halda að byltingin sé yfirstaðin

 

 

 

Ingimundur baðst lausnar