Afmæliskveðja!

Hún fæddist á Selfossi þann 3. maí, árið 1963, tveimur mánuðum fyrir tímann og vó aðeins 6 merkur.  Hún var vafin í bómull, sett í skókassa og svo var brunað með hana suður til Reykjavíkur, á vökudeild Landsspítalans þar sem hún braggaðist vel og útskrifaðist úr sinni fyrstu “prófraun” á lífsleiðinni.  Síðan þetta var hefur hún háð fleiri og annarskonar “prófraunir” og staðist þær allar með sóma.  Í dag er hún 45 ára, yfir 1,70 cm á hæð, 2ja sona móðir og ónæmisfræðingur að mennt.

Ég kynntist henni fyrst í júlímánuði þetta sama ár en þá var ég 10 og ½ árs gömul.  Ég fékk það ábyrgðamikla hlutverk að fara í vist hjá stóru systur, móður litla krílisins.  Ég sat tímunum saman og horfði á hana og dáðist að henni og af litlu kjólunum hennar, sem mig langaði reyndar mjög mikið til að eiga, því þeir hefðu passað svo vel á dúkkuna mína, hana Jóhönnu.

Þetta 10 og ½ ár sem skildi okkur að í aldri var náttúrulega rosalega mikill aldursmunur fyrstu árin, en mér þótti alltaf ofurvænt um þessa litlu frænku mína.

Þegar ég var 19 ára mun ég hafa sagt henni að ég væri að fara til Englands til að heimsækja Bítlana og svo ætti ég heimboð í te hjá Elísabetu drottningu!  8 ára barnið trúði þessu að sjálfsögðu og gerði það í nokkur ár.  Hún spurði alltaf frétta af Bítlum og drottningu þegar við hittumst í fríum frá þessari áralöngu “útlegð” minni.

En svo “eyddist” aldursmunurinn og síðustu 30 árin eða svo, höfum við verið bestu vinkonur.  Hún hefur reyndar nokkrum sinnum verið spurð að því hvort hún sé dóttir mín, nú síðast í morgun, þegar við fengum okkur labbitúr í Kringlunni og það er sko í lagi mín vegna.  Það er ekki slæmt að vera líkt við þá glæsilegu ungu konu, sem Sigríður Bergþórsdóttir er.

Elsku frænka og vinkona, ég hef elskað þig frá okkar fyrstu kynnum. Til hamingju með 45 ára afmælið.  Megir þú lengi lifa!  

1. maí - Mín krafa!

Ég fer bara fram með eina kröfu á þessum baráttudegi verkamanna árið 2008.  Þessari kröfu beini ég að stjórnvöldum, samningsaðilum í kjarasamningum og öðrum þeim, sem finnst þeim málið varða.

 

Krafa mín er þessi:

 Ég vil réttlátt þjóðfélag!

 Greinargerð:

Lágmarkslaun og almannatryggingabætur þurfa að taka mið af raunverulegri framfærsluþörf, þess vegna þarf að vera til opinber og viðurkennd neysluviðmiðun, sem ákvarðar þann framfærslugrunn sem þarf til að einstaklingar geti lifað lífinu með reisn.    

Í dag lifa allt of margir Íslendingar undir fátæktarmörkum.  Fátækt er ljótur blettur á okkar þjóðfélagsmynd,  sem út á við sýnir ríkidæmi í þotuliðs glansmynd.  Fyrir nokkrum misserum síðan kom út skýrsla frá OECD,  þar sem fram kom  að ekki  færri en  5000  íslensk börn  lifðu við aðstæður undir fátæktarmörkum.  Það var á  góðæristímum.  Hvað verða þessi börn mörg  í  "hallærinu", sem margir spá að  við séum að ganga inn í?

Þegar talað er um meðaltalstekjur þegnanna gefur það engan veginn rétta mynd af þeirri geigvænlegu tekjuskiptingu sem hér ríkir.  Meðaltalslaun bankastarfsmanna gefa til að mynda ekki rétta mynd af tekjuskiptingunni í þeim geira.  Ég get vel ímyndað mér að bankagjaldkerinn súpi kveljur þegar hann les um það í dagblöðum hversu langt undir ”meðaltalinu” hans laun eru.

Undanfarin ár höfum við, almennir launamenn látið hafa okkur af fíflum.  Stéttlausa samfélagið, sem við gátum státað okkur af er fokið fjandans til.  Íslenska þjóðin er orðin stéttskiptari en sjálfur Bretinn.

Ef  gengið verður að þessari aumu kröfu minni um ”Réttlátt þjóðfélag”, er það frumskilyrði að taka upp ”opinbera og viðurkennda neysluviðmiðun”, þá yrði eftirleikurinn mun auðveldari fyrir launþega á almennum vinnumarkaði.  Þá hefðum við þann grunn, sem við gætum miðað okkur við í launakröfum okkar. 

Ég hef aldrei skilið forystumenn verkalýðsfélaga, sem hrópa einhverja tölu ”út í loftið”, sem þeirra kröfu um lágmarkslaun.  Þeir segja svo í tveggja manna tali að lágmarkstalan skipti ekki máli, af því að enginn fái hvort sem er greitt eftir henni!!!
Það er bara ekki rétt, því laun svo margra eru miðuð við þessa umsömdu tölu.

Vont og verst

Vont er að láta leiða sig,

leiða og neyða.

Verra að láta veiða sig,

veiða og meiða.

Vont er að vera háð,

verst að lifa af náð.

Gott er að vera fleyg og fær

Frjáls í hverju spori.

Sinnið verður sumarblær,

Sálin full af vori.

Höf. Ólöf Sigurðardóttir frá Hlöðum.

Launþegar til hamingju með daginn.  Sýnum samstöðu og tökum þátt í kröfugöngum dagsins um  land allt!

Kröfuganga frá Hlemmi

Skelfilegt ástand að mati tuðara!

Ég var að hugsa um að láta síðustu færslu mína standa í einhvern tíma og vonaði að bjartsýniskastið, sem fram kemur í henni myndi myndi duga mér í einhvern tíma.  Það er nefnilega talað um okkur sem gagnrýnum aðgerðir/aðgerðaleysi stjórnvalda, sem tuðara dauðans og ég "grínstrumpurinn" er sko ekki ein af þeim!

Í hvert sinn, sem ég fletti dagblöðum, horfi á fréttir eða eins og ég gerði í gærkvöldi, horfði á "Silfrið" hans Egils, þá hrapa ég niður í "ægisvart" þunglindi og tuðarinn í mér brýst fram.

Sálfræðingurinn, sagði að "trukkabílstjórnar" kynnu ekki stradigíuna við mótmæli.  Þeir hefðu eytt sínum sparnaði og lánum í kaup á rándýrum atvinnutækjum og sætu uppi með það, hann aftur á móti hefði menntað sig og þess vegna veit hann sjálfsagt allt um stradegíu mótmæla!

Þingfréttaritarinn vissi af "mótmælaskóla" einhverstaðar í Afríku held ég að hún hafi sagt og dró upp fagra mynd af "faglegum mótmælum"!

Þingmaðurinn dirfðist að minnast á undir kraumandi óánægju þegnanna, en var kveðinn í kútinn af "faglega" "stradegíu" fólkinu!

Rithöfundurinn was my man!  Mikið vildi ég að það hefði tekist að koma honum á þing á sínum tíma.  Hann virðist hafa góða sýn á þankagang þjóðarinnar.

Gafst upp í miðju viðtali við utanríkisráðherrann, því það læknaði mig síður en svo af svartsýnis tuðinu.

En er nokkuð skrítið að við tuðarar séum langt niðri.  Hér eru sýnishorn af fréttum dagsins á Mbl.:

Helst í fréttum

• Verðbólgan „skelfileg"

• Norskt skip að ólöglegum veiðum

• „Verðbólgutölur skelfilegar"

• Austurríkismaður viðurkennir brot sín

• Lést af völdum brunasára

Ég er sammála talsmönnum ASÍ um að verðbólgan sé skelfileg.  Verða þá sett lög á flugstjóra og flugfreyjur. Landsspítala "háskólasjúkrahúsi" verður kannski bara lokað og aðrir væntanlegir kröfuhafar um betri kjör verða bara múlbundnir eða gasaðir???.

 Nú hafa launþegasamtök 2 daga til að koma sínum umbjóðendum í gegnum "mótmælendanámskeið" sem kennir okkur, hinum tuðandi almenningi "stradegíuna" fyrir 1. maí. 

"Fram þjáðir menn í þúsund löndum"

P.s. Svo eru Norsarar farnir að stela frá okkur!  Þeir halda kannski að Haarde hafi fengið yfirráðin fyrir hönd "föðurlandsins".

Verðbólgan „skelfileg"

Sumarið er komið....

og tilhlökkunin mikil hjá flestum.  Spáð er góðu veðri, en miðað við hitatölur á landinu síðustu nótt tel ég líklegt að Sólin verði á norður helmingi eyjunnar okkar í sumar. 

En hvað sem veðri líður mun þessi árstíð heita Sumar með stóru S.

 

 

 

 

 

 

 

 Kristrún Amelía fer að taka fram hjólið sitt.

 

 

 

 

 

 

 

 

 

 Erica Ósk er kominn upp úr vagninum og sest í kerru.

 

 

 

 

 

 

 

 Róbert Skúli skreppur örugglega í sveitina og tekur til hendinni.

 

 

 

 

 

 

 

 

 

En þetta verður fararskjóti Róberts Skúla í borginni.

En amman er að spá í labba svolítið í sumar, bara spá í það sko.  Við sjáum til.

Gleðilegt og gott sumar, hvernig sem viðrar.

Verða mótmæli leyfð þann 1. maí?

1. Maí er eftir viku.  Það verður forvitnilegt að sjá hvort hin hefðbundna "skrúðganga" breytist nú loksins í alvöru KRÖFUGÖNGU, þar sem gengdarlausum hækkunum á nauðsynjum verður MÓTMÆLT, eins og óskrifuð lög gera ráð fyrir og er þá tími til kominn.

Er ekki kominn tími til að "landinn" sýni nú loksins hvað í honum býr og mótmæli þeim gengdarlausu hækkunum, sem dynja á okkur þessa dagana.  Heyrði í konu í gær sem fer reglulega í litun og plokkun.  Hækkunin frá síðasta mánuði var rosaleg og í raun alveg út í hróa.  Núna kostuðu herlegheitin kr. 3.300 en kostuðu í síðasta mánuði kr. 2.200!!!  Þetta er bara oggulítið dæmi um það hvernig sumir notfæra sér "hækkun í hafi" og hafa hingað til komist upp með það .

Ég held að reiði almennings birtist að einhverju leiti í samstöðu þeirra með bílstjórum og það væri gott ef þessi vakning verður til þess að launþegar sýni þá samstöðu sem þarf á baráttudegi verkalýðsins því oft var þörf en nú er nauðsyn.  

Launþegar allra stétta, sameinumst og stöndum vörð um réttlætið.  Af nægu er að taka.  Vaxtahækkanir, matvöruverðshækkanir og allt sem getur hækkað hefur hækkað.........nema launin, þau standa í stað og lækka í verðgildi.  

Atvinnubílstjórar, haldið áfram að halda okkur hinum við efnið.

Mótmælendur handteknir

Göltur v Súgandafjörð

Ég á mér uppáhaldsfjall.  Fjallið heitir Göltur og er það vinstra megin þegar siglt er inn Súgandafjörð.  Norðanmegin í þessu fjalli er lítil vík, sem heitir Keflavík og þar er Galtarviti.  Veðurathuganir eru ekki lengur stundaðar í Galtarvitanum, þannig að það er svolítið langt síðan maður hefur heyrt:  Galtarviti, norð, norð, vestan 8, hiti 2 stig.  Það eru miklu hlýlegri veðurlýsingarnar frá veðurathugunarstöð Ásthildar í Kúluhúsinu á Ísafirði, og þær duga mér, en kannski ekki sjófarendum og þeir eru æði margir þarna um sumarmánuðina.

Ég hef einu sinni gengið út eftir Galtarfjallinu og alveg út á enda.  Skátafélagið Glaðherjar á Suðureyri stóð fyrir þeirri ferð með Birki Friðbertsson í Birkihlið, sem fararstjóra.  Við púkarnir í hópnum vorum nokkuð viss um að þetta hvíta, sem við sáum við sjóndeildarhringinn væri Grænland, þeir fullorðnu voru ekkert að draga úr því, sögðu að þetta væri í það minnsta hluti af Grænlandi, sem sagt Ísjaki, sem þeir vonuðu að snéri nú bara heim á leið aftur.

Eftir nokkrar e-mail sendingar á milli mín og bloggvinar míns og góðs félaga, Róberts Schmidt, hefur okkur tekist að prýða síðuna mína flottri mynd af Súgandafirðinum með Göltinn í forgrunni.  Það er tilefni þessarar færslu.

Súgandafjörður með Göltinn í forgrunni

GÖLTUR

Göltur úr hafinu gnæfir hátt,

gnípuna ber við loftið blátt, 

jafnvægi og tign er í fjallsins fasi,

hér fjarar aldrei í tímans glasi,

því hamrarnir standast tímans tönn,

sem tinna þeir brjóta af sér klaka og fönn. 

(Guðmundur Ágústsson orti ljóðið og myndina tók Halldóra Hannesdóttir)  

Einkavæðing fyrir ESB aðild?

Getur það verið að samhliða viðræðum um núverandi ríkisstjórnarsamstarf hafi verið unnið að öðrum sáttmála á bak við tjöldin?  Einkavæðing heilbrigðisþjónustunnar, með millilendingu í h/f ingu fæst fyrir Evrópusambandsaðildar-umsókn!

Ætli kjörnir fulltrúar viðkomandi flokka viti af þessu? 

Landspítalinn opinbert hlutafélag?

Verður þetta sumar hinna mörgu verkfalla?

Ég tek undir með nöfnu minni hjá Flugfreyjufélagi Íslands, sem lýsir yfir undrun á því að ekkert fundarboð hafi borist í dag frá ríkissáttasemjara í kjaradeilu flugfreyja og flugþjóna við Icelandair.

Ég hef það á tilfinningunni að Ásmundur (er hann ekki annars yfirsáttasemjari?), ætli að reyna að endurheimta dýrðarljómann sem hann baðaði sig í forðum daga, þegar hinir ríkisstjórnarvænu þjóðarsáttarsamningar voru settir á láglaunafólk þessa lands.  Ég mun alltaf muna eftir konu, sem féll í grát, þegar hún opnaði fyrsta launaseðilinn eftir þessa margumræddu samninga, hún hafði lækkað í launum.  Hún vann við fiskvinnslu, var dugleg og bónusgreiðslur höfðu verið eftir því.  Nú brá svo við að elsku karlinn (og góðvinur pabba míns), hann Einar Oddur (blessuð sé minning hans), fiskvinnslufrömuður á Flateyri, ákvað að taka hluta af bónusstuðli inn í tímakaupið og minnka vægi bónusgreiðslna!  Gott og vel tímakaupið hækkaði, en vægi bónusgreiðslna lækkaði.  Duglega konan hafði í rauninni borgað sjálf þá hækkun sem hún fékk á tímakaupið og þar sem bónusvægið minnkaði, lækkaðu heildarlaun hennar.  Launaútgjöld fiskvinnslunnar lækkuðu eða stóðu í stað!

Ég skil vel aðkomu Einars Odds að þessum svokölluðu þjóðarsáttarsamningum en ég mun seint fyrirgefa forystumanni launþegahreyfingarinnar, Ásmundi Stefánssyni þennan gjörning. 

Annars fór ég á trúnaðarmannafund hjá mínu stéttarfélagi í síðustu viku og ég verð að segja að ég er ekkert svakalega bjartsýn fyrir hönd okkar sjúkraliða eftir þann fund.  Ekki mikið að frétta frá samninganefndinni!!  En ítrekað bent á gylliboð einhvers flugfélags okkur til handa.  En við förum nú varla langt á núverandi launakjörum og því síður ef flugfreyjurnar eru að fara í verkfall.

Áfram flugfreyjur! 

Ekkert fundarboð hefur borist

Að "grúska" í gamalli tíð!

Ég geri rosalega lítið þessa dagana.  Hef verið í "lamasessi" síðan um Páska og ekki getað stundað mína gefandi og skemmtilegu vinnu.  Þetta hefur gefið mér tækifæri til að horfa vel í kringum mig á heimilinu og sjá "allt" sem ég þyrfti nú að gera.  Nú gæti ég t.d. verið í "vorverkunum", en það eru þessi þrif, sem ég tel mér alltaf trú um fyrir Jólin að ég geri bara á vorin.  En déskotans öxlin, er ekkert betri til heimilisverka heima hjá mér en á vinnustað, þannig að ég geri ekki neitt.

Ég gæti bloggað, eins oft og ég sest við tölvuna (sem er æði oft), en það er eins og hugurinn tæmist í þessu aðgerðaleysi.  Sumir kalla það "bloggstíflu" en í mínu tilfelli held ég að það sé algert "sinnuleysi", vegna skorts á framkvæmdagetu.  Einhverstaðar segir að "hugur og hendi fylgist að", en þegar höndin getur ekki framkvæmt það sem hugurinn vill, verður maður hálf hokinn um tíma....eða þar til það venst (það er vont en það venst syndrómið!).

Ég hef verið að "glugga" í gamla pappíra undanfarna daga, sem komu í mína umsjá eftir að foreldrar mínir féllu frá og það má eiginlega segja að ég hafi horfið heila öld aftur í tímann.  Þetta er sko skemmtilegra en að fylgjast með fréttum líðandi stundar.  Ef ég byggi yfir meiri tæknikunnáttu, væri ég svo sannarlega búin að deila einhverju úr þessum fjársjóði með ykkur.  En koma tímar, koma ráð.

Mig langar þó til að deila með ykkur "kveðju" af 100 ára gömlu póstkorti, sem afi minn, Albert Finnur Jóhannesson fékk, frá frænda sínum og "kunningja" Guðmundi Kristjánssyni, sem þá var staddur í Danaveldi:

Albert F. Jóhannesson,

Suðureyri. 

Góði frændi og kunningi.

Þökk fyrir allt gamalt og gott.  Hvernig hefir þú það annars núna.  Jeg hef það heldur gott.  Mikið er hjer af stúlkum skal jeg segja þjer, en þó vantar mikið á að þær sjeu eins laglegar og heima.

Hvernig gengur annars með kærustuna þína, heilsaðu henni og fleirum frá mér.

Ertu hættur að kveða gamlar vísur í rökkrunum og fleira?  Jeg gæti vel liðið að þú skrifaðir mjer fáeinar línur ef þú hefðir list til.

Jeg óska þjer æfinlega alls góðs, vertu sæll,

G. Kristjánsson. 

Á framsíðu þessa póstkorts, er síðan mynd af sendandanum (rosalega flottur náungi!), þar sem hann skrifar:

Þú þekkir peiann vona jeg.

sami. 

Fyrir Hallgerði, mína ljúfu bloggvinkonu:  Albert Finnur, afi minn og Guðmundur Kristjánsson voru bræðrasynir.  Synir Jóhannesar Alberssonar og Kristjáns Albertssonar, en afi þeirra Albert Jónsson, var oft nefndur faðir Suðureyrar ættleggsins!   Guðmundur þessi var bróðir Kristjáns Alberts Kristjánssonar, langafa barnanna þinna.

Gagn og gaman!

Róbert Skúli, 3ja ára sonar sonur minn er hjá mér núna og við erum búin að eiga saman yndislegt og fræðandi kvöld.  Á þessari mynd er er hann loksins búin að ná þeim langþráða áfanga að verða 3ja ára.

Við horfðum saman á Útsvarið og Söngvakeppni Framhaldsskólanna með hléum, því hann þurfti líka að kenna ömmu sinni á Bubbi byggir tölvuna sína.  Tölva þessi er algjört undratæki.  Hann fékk hana í afmælisgjöf í byrjun febrúar og í dag kann hann alla stafina og tölustafina, bæði á ensku og íslensku!  Hann á nú eina ætt að rekja til Englands svo það er nú í lagi að hafa tilfinningu fyrir því máli líka.

Á myndinni hér til hliðar er hann að kenna Jóni Eric frænda sínum og Ericu Ósk frænku sinni á tölvuna sína. 

Þegar í ljós kom, að hann var farin að þylja stafrófið á ensku var farið að halda að honum því íslenska og í kvöld þegar hann var að stafa (lesa) fyrir ömmu sína, gat hann alveg aðskilið tungumálin.

Nú sé ég fram á að ég þarf að fara að sanka að mér bókum, sem kenna lestur á skemmtilegan hátt, því það er náttúrulega um að gera að kenna þetta meðan áhugi er fyrir hendi og verkefnið er skemmtilegt, en ágætu foreldrar: ég lofa að þröngva þessu ekki upp á hann.

Í gær átti ég svo góða stund með sonardætrunum, Kristrúnu Amelíu og Ericu Ósk, þannig að þessi helgi er bara búin að vera nokkuð fjölskylduvæn hjá mér.

 Næstu daga er ég svo að hugsa um að finna fleiri raddir í "grátkór" fjármálaráðherra.