Verður þetta sumar hinna mörgu verkfalla?

Ég tek undir með nöfnu minni hjá Flugfreyjufélagi Íslands, sem lýsir yfir undrun á því að ekkert fundarboð hafi borist í dag frá ríkissáttasemjara í kjaradeilu flugfreyja og flugþjóna við Icelandair.

Ég hef það á tilfinningunni að Ásmundur (er hann ekki annars yfirsáttasemjari?), ætli að reyna að endurheimta dýrðarljómann sem hann baðaði sig í forðum daga, þegar hinir ríkisstjórnarvænu þjóðarsáttarsamningar voru settir á láglaunafólk þessa lands.  Ég mun alltaf muna eftir konu, sem féll í grát, þegar hún opnaði fyrsta launaseðilinn eftir þessa margumræddu samninga, hún hafði lækkað í launum.  Hún vann við fiskvinnslu, var dugleg og bónusgreiðslur höfðu verið eftir því.  Nú brá svo við að elsku karlinn (og góðvinur pabba míns), hann Einar Oddur (blessuð sé minning hans), fiskvinnslufrömuður á Flateyri, ákvað að taka hluta af bónusstuðli inn í tímakaupið og minnka vægi bónusgreiðslna!  Gott og vel tímakaupið hækkaði, en vægi bónusgreiðslna lækkaði.  Duglega konan hafði í rauninni borgað sjálf þá hækkun sem hún fékk á tímakaupið og þar sem bónusvægið minnkaði, lækkaðu heildarlaun hennar.  Launaútgjöld fiskvinnslunnar lækkuðu eða stóðu í stað!

Ég skil vel aðkomu Einars Odds að þessum svokölluðu þjóðarsáttarsamningum en ég mun seint fyrirgefa forystumanni launþegahreyfingarinnar, Ásmundi Stefánssyni þennan gjörning. 

Annars fór ég á trúnaðarmannafund hjá mínu stéttarfélagi í síðustu viku og ég verð að segja að ég er ekkert svakalega bjartsýn fyrir hönd okkar sjúkraliða eftir þann fund.  Ekki mikið að frétta frá samninganefndinni!!  En ítrekað bent á gylliboð einhvers flugfélags okkur til handa.  En við förum nú varla langt á núverandi launakjörum og því síður ef flugfreyjurnar eru að fara í verkfall.

Áfram flugfreyjur! 

Ekkert fundarboð hefur borist

Athugasemdir

[Sigrún Jónsdóttir, 17.4.2008 kl. 21:07]

Var að koma heim, missti af fréttum. Á hvaða stöð..please?

[Sigrún Jónsdóttir, 17.4.2008 kl. 21:21]

Hallgerður, ertu að segja mér að Sigrún Jónsdóttir, formaður Flugfreyjufélagsins, sé dóttir þín???  Ég var að tengja!  Fréttin á RÚV kemur ekki í gegn, en ég horfi um leið og það gerist. Ég er þrælmontin frænka.

[Guðrún Jóna Gunnarsdóttir, 17.4.2008 kl. 21:41]

Er ansi hrædd um að það sé full ástæða til svartsýni í þessum kjarasamingum. Ríkið er búið að ákvarða þakið, ætlar sér ekki lengra. Í fyrsta sinn í langan tíma hef ég einungis trú á einni aðferð; hörku. Við ummönnunarstéttir verðum að fara láta sjást í vígtennurnar.

Gangi þér vel í samningunum, baráttukveðjur 

[Sigrún Jónsdóttir, 17.4.2008 kl. 21:56]

Guðrún, ég er þér algerlega sammála.  Ég hef trú á að mitt félag, sé að bíða eftir þínu félagi og ætli að taka þátt í einhverju snjóbolta syndrómi!

Ég held að stéttirnar okkar ættu að styðja hver aðra í baráttunni, með gagnkvæmri virðinu fyrir stöðu og menntun.  Mér hefur stundum fundist vanta svolítið upp á það og þá sérstaklega frá forystu míns félags, því miður.  

[Ásthildur Cesil Þórðardóttir, 18.4.2008 kl. 00:47]

Já það er hætt við að margt fari úr skorðum á næstunni. 

[Hólmdís Hjartardóttir, 18.4.2008 kl. 00:51]

nú held eg að dugi ekkert nema harkan og það er tími til kominn.

[Ásdís Sigurðardóttir, 19.4.2008 kl. 14:57]

Ég stend með ykkur í þessari baráttu, þó svo ég geti lítið gert nema vonað, en síðustu áratugi hafa þeir yfirleitt svikið og samið illa því miður, verður þetta einhverntíman í lagi, ég spyr??? hrædd um ekki

en við stígum vonardansinn saman