Meira vald til hins almenna kjósanda. Gott mál.

Ég hlakka til að sjá væntanlega útfærslu á því að tekið verði upp persónukjör í kosningum til Alþingis.  Það er stutt til næstu kosninga og ég efast um að það takist að stofna til nýrra framboða.  En ef það tekst þá þurfa þeir einstaklingar sem þar veljast til forystu helst að vera þekktir af fyrri verkum sínum svo þeir nái þeirri athygli sem þarf.

Núverandi þingmenn hafa baðað sig í misbjörtu sviðsljósinu og munu eflaust vilja halda því áfram.  Fæstir þeirra hafa heyrt kröfurnar um að breytinga sé þörf.  Þeir taka þær alla vega ekki til sín.  Oddvitar flokkanna eru í forystusveit flokkanna og falla því undir það sem ég vil kalla úrelta stjórnmálamenn, sem þurfa hvíld.  Ég vil nýtt fólk í forystu allra flokka og það á við um það fólk sem kemur til með að leiða lista síns flokks/framboðs.

Ég var að fara yfir það með vinkonu minni á dögunum hverjir hefðu leitt lista flokkanna hér í Reykjavíkurkjördæmi norður fyrir síðustu kosningar og ég get með sanni sagt að ég gæti ekki kosið einn einasta þeirra

Þess vegna verður fróðlegt að vita hvort við hinir almennu kjósendur getum breytt vali flokksbundinna eða hvort valið verður einfaldlega alfarið fært í okkar hönd.

Stefnuskrár flokkanna ættu auðvitað að vera okkur kjósendum nóg, en það skal bara viðurkennast að við lestur á stefnuskrám hinna ýmsu flokka kemur í ljós að þær eru ansi keimlíkar.  Alla vega hvað þá málaflokka varðar sem ég fylgist mest með.  Þess vegna er persónan sem valin er til að framfylgja stefnunni svo nauðsynleg og alls ekki sama hver er. 

Annars er ég opin fyrir hugmyndum í átt að raunverulegum breytingum.  Verð að viðurkenna að ég fékk hálvegis velgju að horfa á suma af "gömlu" pólitíkusunum í umræðunum á Alþingi í kvöld

Opnað fyrir persónukjör

Athugasemdir

[Steingrímur Helgason, 5.2.2009 kl. 00:19]

Nýtt þjóðfélag kallar á nýtt fólk til forystu.

Ég tek því undir með þér, mér fannzt enda grátkór bæði stjórnarliða sem & stjórnarandstöðu báðum fylkíngum til vanza.

Þingmenn vorir eru ekki að sjá hverjum klukkan glymur.

Segjum þeim til í vor.

[Sigrún Jónsdóttir, 5.2.2009 kl. 00:29]

Þetta var akkúrat það sem ég vildi sagt hafa Steingrímur.....fór bara lengri leiðina  Takk fyrir.

[Hólmdís Hjartardóttir, 5.2.2009 kl. 00:33]

við skulfum ekki á Austuvelli til einskis...

[Sigrún Jónsdóttir, 5.2.2009 kl. 00:37]

Nei Hólmdís, sumir virðast hafa hlustað

[Jóna Kolbrún Garðarsdóttir, 5.2.2009 kl. 00:55]

Vonandi gefur hæft og gott fólk sig fram í nýju framboði fyrir kosningarnar í vor. 

[Sigrún Jónsdóttir, 5.2.2009 kl. 01:03]

Við munum alla vega halda vöku okkar Jóna mín

[, 5.2.2009 kl. 09:15]

Já merkilegt hvað "minn flokkur vill" ætlar að vera langlíft þrátt fyrir pottaskellina

[Jenný Anna Baldursdóttir, 5.2.2009 kl. 10:14]

Ég bíð spennt eftir að sjá hvort persónukjörið næst inn fyrir kosningar.

Hæpið en ég vona.

[Helga Magnúsdóttir, 5.2.2009 kl. 10:27]

Best að láta frambjóðendur vita að pottarnir og sleifarnar hafa ekkert verið læst inni í skáp. Þau má taka upp aftur hvenær sem er.

[Rut Sumarliðadóttir, 5.2.2009 kl. 11:46]

Gætum við ekki númerað fólkið þegar við kjósum, svona topp 10-63?

[Sigrún Jónsdóttir, 5.2.2009 kl. 13:13]

Takk fyrir innlit og innlegg kæru vinir.  Ég ætlaði að vera í "bloggfríi" í dag en gengur eitthvað illa að halda mig frá tölvuskrattanum

[Sigríður Ásdís Karlsdóttir, 5.2.2009 kl. 13:39]

Sigrún mín. Byltingin er hafin en henni er langt ífrá lokið.  Baráttukv til þín. kv.Sirrý.... Jebb svo er það þetta með tölvuna og heimilisverkin