Enn einn minnisvarðinn!

Þá hefur nýjasti heilbrigðisráðherrann komist að sömu niðurstöðu og nokkrir af fyrirrennurum hans:  Byggja skal nýtt “hátæknisjúkrahús” við Hringbraut!!  Ég hef aldrei skilið röksemdir fyrir þessari ákvörðun.  Hringbrautin er ekki lengur miðsvæðis á Reykjavíkur svæðinu,  Hringbrautin er í útjaðri stór Reykjavíkur svæðisins.

Hringbrautar sjúkrahúsið er kannski í nágrenni við Háskóla- og rannsóknar aðstöðu í Vatnsmýrinni, en það verður varla þannig að fólk verði “hlaupandi” á tveimur jafnfljótum á milli þessara svæða, enda býst ég við að starfsmenn  og nemar þessara stofnana búi vítt og breytt um stór Reykjavikur svæðið og að það sé ákveðið með einhverjum fyrirvara hvar deginum verði varið!

Það var “voðalega sætt”, þegar tilkynnt var að nota ætti hluta af söluandvirði Símans í byggingu nýs “hátæknisjúkrahúss”, en það gleymist alltaf að það þarf að manna þetta sjúkrahús með góðu starfsfólki og miðað við fréttir undanfarin misseri, standa fyrir dyrum lokanir deilda vegna uppsagna starfsfólks, sem er ósátt við sín kjör.

Hvernig væri að hluti af þessum “Símasölupeningum” verði notaður til að bæta kjör heilbrigðisstétta?  Húsbyggingar eins og nýtt “hátæknisjúkrahús” og ný hjúkrunarheimili bæta ekki þjónustuna við samborgarana ef ekkert er starfsfólkið!

Besta staðsetningin við Hringbraut

Athugasemdir

[Halldóra Hannesdóttir, 27.2.2008 kl. 23:17]

Kvitta fyrir innlitið, takk fyrir kaffið !

[Guðrún Jóna Gunnarsdóttir, 28.2.2008 kl. 01:21]

Stjórnvöld ætla seint að átta sig á því að það er ekki nóg að byggja kassana og kaupa tækin, það þarf fagfólk til starfa. Hversu mörg rýmu skyldu vera laus á landsvísu þar sem ekki fæst nægilega margt starfsfólk?

[Ásthildur Cesil Þórðardóttir, 29.2.2008 kl. 10:15]

Já mestu vandræðin eru skortur á starfsfólki vegna lélegrra launa og slæms aðbúnaðar hjúkrunarstétta. Á eitthvað að laga það ?

[Sigrún Jónsdóttir, 29.2.2008 kl. 11:09]

Ég þakka innlitið stúlkur!

Það er með ólíkindum, hvað ráðamenn eru alltaf fastir í steinsteypunni, en miðað við loforðaflauminn fyrir síðustu kosningar, hélt ég að nú yrði hugað að "umönnunarstéttunum"! Muniði?

Samningar fagstéttanna, þ.e. hjúkrunarfræðinga og sjúkraliða eru lausir með vorinu og ég verð að viðurkenna að ég er ekkert svakalega bjartsýn.  Það er víst komin "kreppa", en hún skýtur alltaf upp kollinum í tengslum við kjarasamninga!