Grjónagrautur og Leiðarljós:)

Ömmustelpan Kristrún Amelía gisti hjá mér í nótt.  Hún verður 9 ára í ágúst og þ.a.l orðin svona lítil "manneskja" í mótun

Við skruppum í Smáralindina í gær, en þangað hafði ég ekki komið síðan á góðærisárinu 2007!  Ástæða fyrir Smáralindarheimsókn var að unga daman vissi af "geðveikum" gúmmískóm til sölu þar, sem kostuðu "svo lítið" en væru alveg æðislegir og ég væri sko besta amman í heiminum ef ég keypti þá fyrir hana   Svo er"kreppan" búin amma mín, því skórnir eru ódýrari núna en þeir voru áður

Með skóna í poka, gengum við sælar út í sumarkuldann.  Kristrún Amelía, sæl með sínu "geðveikt flottu" skó og amman sæl með nafnbótina "besta amman í heiminum" fyrir andvirði kr. 1.200.-  Hver sagði að ástin kostaði ekkert?

Kvöldið leið í notalegheitum.  Spjalli og sjónvarpsglápi með poppi og sollis

Við vöknuðum kl. 9:14 í morgun og fyrsta sem daman sagði þegar hún vaknaði var:  Amma, viltu gera grjónagraut?  Ákv. að bíða með hann til hádegis......en sú bið þótti of löng, þannig að grjóni var tilbúin fyrir kl. 11:00.

Þá hófst skrítið tímabil.  Unga daman settist fyrir framan sjónvarpið og horfi á LEIÐARLJÓS!....og borðaði sinn grjónagraut.

Amma: Er þessi þáttur nokkuð fyrir stelpur eins og þig Kristrún mín?

Kristrún: Ég horfi alltaf á hann!

Nú er amman í vandræðum, hefur aldrei horft á þessa þætti og veit ekki hvort þetta er æskilegt sjónvarpsefni fyrir ungar stúlkur "í mótun"  Getur einhver hjálpað mér?

Ég fór ósjálfrátt að bera saman minn raunveruleika frá 9. aldursárinu.  Já ég fór að rifja upp "gamla daga" og bera saman við raunveruleika dagsins í dag

Ég á 9. árinu hjá ömmu minni (sem reyndar bjó á heimilinu), les upphátt fyrir hana úr Öddu bókum á meðan hún prjónaði sokka eða vettlinga á Súgfirska sjómenn

Kristrún Amelía á 9. árinu horfir á amerískan væluþátt (ég veit þó það mikið um þáttinn) og amman situr við tölvuna og spjallar við vinina á facebook!

Kristrún Amelía hefur verið í dansskóla í allan vetur og á morgun mun hún taka þátt í sinni fyrstu danskeppni.   Laugardalshöllin, hvorki meira né minna   Mikil tilhlökkun í gangi hjá dömunni.  Búin að fá "keppniskjól" og alles og  amman mætir að sjálfsögðu fyrir allar aldir á sunnudagsmorgni og horfir á dýrðina

Amman lærði líka dans, þegar hún var 9 ára.  Dansskóli Heiðars Ástvalds sendi okkur kennara á hverjum vetri og dansinn var stiginn við undirleik frá segulbandi.  Engin danskeppni hjá okkur púkunum og engin verðlaun í boði fyrir góðan árangur....nema ánægjan yfir því að kunna "sporin" og fá að dansa við sætasta strákinn í lok danskennslu

 

Athugasemdir

[Rut Sumarliðadóttir, 9.5.2009 kl. 13:09]

Tímarnir breytast og mennirnir með Sigrún mín.

[Ragna Birgisdóttir (IP-tala skráð) 9.5.2009 kl. 14:36]

Oh við erum líklega að verða gamlar Sigrún mín.En með aldrinum eykst viskan og ég held að þetta sjónvarpsefni sem blessað barnið er að horfa á sé nú líklega ekki það besta fyrir ómótaðar sálir.En tímarnir breytast og mennirnir með og við getum líklega ekkert gert annað en að vera á varðbergi og grípa í taumana ef að illa stefnir. Það er ást.

[Ía Jóhannsdóttir, 9.5.2009 kl. 14:48]

Ekkert eins gefandi og ömmuhlutverkið.  Knús inn í góða helgi.

[Marta smarta, 9.5.2009 kl. 15:45]

Æi svo sæt upprifjun og gaman að rifja upp tímana tvenna, knús til ykkar.

[Guðrún Emilía Guðnadóttir, 9.5.2009 kl. 17:24]

Þetta var yndislegt að lesa, já væluþáttur er þetta leiðindaljós, en veit ekki hvort hann er eitthvað meira meiðandi en hvað annað sem þau horfa á. Já tímarnir breytast, en ég sakna samt gamla tímans þar sem allt var svo rólegt og gott, eða sko í minningunni.
Njóttu þessara flottu stelpu þinnar því tíminn er svo fljótur að líða,
grjónagrautur og sápa, það getur ekki verið betra.
Ljós til þín ljúfa kona
Milla

[Sigríður Ásdís Karlsdóttir, 9.5.2009 kl. 18:56]

Blessud Sigrun min.. nei vid erum bara fra ødrum tima . Hlakka til ad fa minar tvær eftir akkurat einn manud til min. eg kem liklega til ad fa hakeslepp yfir hvad 11 og 8 ara vilja eyda deginum i..man eftir ad vid fengum Hermann Ragnars til ad kenna okkur dans a Hotel Akranesi i den. Vantadi alltaf strakana. Njottu vel samverunnar med barnabanet ditt, dad ætla eg ad gera degar minar koma og dekra vid dær.  Hafdu dad sem best kæra. kv Sirry.(sorry får ekki isl staf på pc)

[Hallgerður Pétursdóttir (IP-tala skráð) 9.5.2009 kl. 19:48]

Frábær færsla. Frábær.

Var í svona ferð með Berglindi frænku þinni.Sem var að eigin sögn gjörsamlega fatalaus! Er það ekki tilkynningarmál? Þó sýndist mér barnið þokkalegt til fara.

[Jenný Anna Baldursdóttir, 9.5.2009 kl. 21:30]

Yndisleg færsla.  Breyttir tímar, en ég held að þetta sé ástarvella þetta Leiðarljós, ekki hættulegt en hvað veit ég.

Afskaplega falleg stúlka sem þú átt.

[, 9.5.2009 kl. 23:14]

Öldin önnur

[Jóna Kolbrún Garðarsdóttir, 10.5.2009 kl. 02:37]

Mín 12 ára er ekki byrjuð að fylgjast með sápuóperum en vill gjarnan fá grjónagraut af og til.  Það eru breyttir tímar, greinilega. 

[Rögnvaldur Þór Óskarsson, 10.5.2009 kl. 08:12]

Allir púkar á Ísafirði fengu pólska, svarthvíta gúmmískó á vorin, seinna var þetta kallað dreifbýlistúttur. Auðvitað eiga ömmustelpur í Rvík að fá nýja gúmmískó á vorin þó þeir séu nú í lit eins og sjónvarpið, breyttir tímar.

Mínir ættingar sem eru í heimsókn fara gjarna í skóbúðina og tékka á því hvort til séu æskuskórnir, oftast verða þeir fyrir vonbrigðum. 

Gangi ykkur skvísum vel í dansinum.

[Guðrún Emilía Guðnadóttir, 10.5.2009 kl. 09:02]

Löngum voru nú til svörtu tútturnar í skóbúðinni, en nú einnig í lit.
Það var nú ýmislegt í skóbúðinni, einu sinni fékk ég blóðeitrun í fótinn, var að koma ofan af sjúkrahúsi, gat ekki notað mína skó svo ég kom við og var ekki gamli sjálfur að vinna, sko Jói jú hann átti sko handa mér inniskó sem myndu henta, fór niður í kjallara og kom til baka með glæsilega flókaskó, svona köflótta og flotta, ég spurði hvað á ég að borga þér heillakallinn, þú mátt nú bara eiga þá vinan, ég gekk í þessum skóm síðan allan veturinn þeir voru svo hlýir.
Hef leitað síðan en ekki fundið sambærilega, svo það er rétt að það eru breyttir tímar.
Ljós í daginn
Milla

[Sigrún Jónsdóttir, 10.5.2009 kl. 09:06]

Góðan daginn öll og takk fyrir innlit og innlegg  Nú þarf amma að drífa sig í höllina

[Gudrún Hauksdótttir, 11.5.2009 kl. 10:00]

Yndisleg frásögn Sigrún mín.

Stórt knús til tín og tinna.

[Ragnheiður , 11.5.2009 kl. 11:10]

Kom við til að brosa, tímarnir hafa sannarlega breyst.

Það tókst nú ekki að kenna mér dans, Hermann gamli var með kennslu í Laugarnesskóla og ég fór einusinni eða tvisvar, neitaði svo að gera meir og haggaðist ekki með það...þrátt fyrir allskyns hótanir. Dans átti maður að læra no matter what ..hehe

[Lilja Guðrún Þorvaldsdóttir, 11.5.2009 kl. 21:36]

Yndislegur pistill, um undurfagra yngismær, mikið skil ég þig ég á eina sem er hálfnuð á níunda árið, og henni finnst mest gaman að horfa á matreiðsluþætti, og þættina hennar Tyru Banks. - Ég get lítið sagt því ég las allar Theresu Charles og hvað allir þessi höfundar ástarsagna hétu, á hennar aldri.

[Hólmdís Hjartardóttir, 12.5.2009 kl. 05:41]

Yndisleg morgunlesning....

[Ásthildur Cesil Þórðardóttir, 12.5.2009 kl. 10:31]

Ein sem dekrar við barnabörnin  Mikið hafið þið haft það notalegt ömmgurnar, gaman og gott að lesa þennan pistil þinn Sigrún mín.  Takk fyrir mig