Sinn er siður í hverju landi!

Eða er það ......landi hverju?

Hvernig væri að rýna aðeins í málshætti af gefnu tilefni?

Einn uppáhalds málshátturinn minn hefur lengi verið: “Ekki er það einum bót…. Þó annar sé verri!!!”  Vinkona mín hún Gitta, gaf mér hann fagurlega ritaðan á platta um það leyti, sem ég útskrifaðist úr sjúkraliða náminu.  Ekki veit ég hvort þarna leyndust dulin skilaboð til mín, en eitt er víst, ég hef reynt að hafa þennan málshátt að leiðarljósi æ síðan og hangir plattinn á áberandi stað á mínu heimili, mér og öðrum til áminningar!

Á Pálmasunnudag fékk ég litla fjölskyldu í heimsókn, og opnuðum við lítil “álegg” svona til að koma okkur í smá Páskastemmingu.  Ég finn nú bara 2 af þeim málsháttum sem þar voru lesnir upp af þeim 4 sem þarna voru, en þeir voru svona:  “Betra er autt rúm en illa skipað”!  Þarna hefur upphaflega meiningin örugglega átt við “skipsrúm”, en ég hugsa að flestir hugsi nú um hjónarúmið í þessu sambandi í dag en hvort sem við er átt er ég þessum málshætti alveg sammála!

Hinn var svona: “Sá sem fleiprar við þig, fleiprar um þig”!  Þessi er náttúrulega hverju orði sannari og gott að hafa þetta í huga.

Í gærkvöld bættust svo 3 málshættir við að loknu óvæntu matarboði hjá mínum gömlu og tryggustu vinum, Hugrúnu Björk og Bernhard.  Við brutum okkur leið inn að málsháttum 3ja Páskaeggja nr. 3 eftir að hafa snætt dýrindis nautalund með öllu tilheyrandi.

Ég man ekki hver fékk hvern, en það skiptir minnstu máli. Nr. 1: ”Betra er að vera laukur í lítilli ætt, en strákur í stórri”!  Þetta er sko alveg rétt, sagði garðyrkjufólkið, sem veit allt um sprettu laukanna.  Ég var nú ekkert að endurtaka það þarna að ég væri af hinni stóru og merku Arnardalsætt!!  Svo er ég líka stelpa

Nr. 2:  ”Tímarnir breytast og mennirnir með”!  Já, já, þessi er gamall og allir þekkja hann, en ætti hann ekki frekar að hljóma svona: ”Mennirnir breytast og tímarnir með”?  Það finnst mér, því tíðarandinn er mannanna verk.

Síðast en ekki síst kom þessi, sem okkur vinunum fannst svo vel við hæfi: ”Verkfæri eru best ný en vinátta er best gömul”! 

Ég mun aldrei geta fullþakkað þá góðu og tryggu vináttu, sem Hugrún og Benni hafa sýnt mér í gegnum árin, en ”koma tímar koma ráð” og ég hlakka til að njóta þessarar vináttu um ókomna tíð.

”Nú er ráð að linni, kveðja að sinni”!

Athugasemdir

[Anna Kristinsdóttir, 24.3.2008 kl. 17:30]

Ég fékk; Allir menn eiga tvær ættir.

Ætli það þýði það að nú eigi ég að líta til móðurfjölskyldu minna í leit að rétta stjórnmálaflokknum?

[Sigrún Jónsdóttir, 24.3.2008 kl. 18:00]

Anna mín, ég veit ég hef sagt þér það áður, en pólitík er ekki genetísk! Ef hún væri það, hefur stökkbreyting átt sér stað í mínu tilfelli!

En það er um að gera að lesa málshættina sem vísbendingar og það á ágætlega við í þínu tilfelli.

[Guðrún Jóna Gunnarsdóttir, 25.3.2008 kl. 00:20]

Hef alla tíð verið mikil ,,málsháttarmanneskja" og lagt upp úr því að geyma hvern einasta. Brá út af vananum þetta árið og fékk mér ekki páskaegg. Kærkomin lesning, takk fyrir mig

[Ásthildur Cesil Þórðardóttir, 25.3.2008 kl. 11:25]

Ég hef reyndar heyrt þennan með laukinn aðeins öðruvísi, eða svona; betra er að vera stór laukur í lítilli ætt, en lítill laukur í stórri. 

Annars er gaman að málsháttum, ég kynntist þeim þegar ég var barn því ég fékk alltaf að hjálpa ömmu að baka málsháttarkökur sem hún bakaði fyrir hver jól, þá var það mitt hlutverk að safna og skrifa málshættina.

Þessi fannst mér alltaf bestur, og á við í dag; neyðin kennir naktri konu að spinna og lötum manni að vinna.